Unité- Démocratie- Justice sociale

Accueil Contactez-nous Sommaire


Google

 

sur le Web

Sur ufpweb.org

 

Ko yowitii e kuule ɗe Goomu Diisnondiral Soldeteeɓe Daraniingu Nuunɗal e Demokarasii saakti e mudda gardagol maɓɓe laamu leydi ndi.

Ñalnde aset 6 Ut 2005 Hooreejo Goomu Diisnondiral Soldeteeɓe daraniingu Nuunɗal e Demokarasii, hono kolonel Eli Wul Mohammed Vall jokkondirii e denndaangal partiiji politik leydi men. E nder konngol ngol o huccitinii e partiiji ɗi; o hollitii heen humpito makko to bannge politik tuggi nde Muritani heɓi hoore mum haa ñalawma hannde o. Humpito makko e parti gooto goodnooɗo o (PPM) e hayaakiiluuji (SEM), batte mumen ko bonɗe e leñol ngol. Omo hoddiri to bannge demokarasii ko fuɗɗunoo e kitaale 90 ko, ko huunde maƴƴere wonnoo, kono mboros bonɗo barɗo ndeen yaakaare ko ronkude seerndude ko foti wonde darnde hooreejo PRDS e ko foti wonde darnde hooreejo leydi. Ko ngal jiiɓondiral jibini dawrugol heedi-heeda, hoore am, hoore am, nguurndam politik leydi ndi telɓi.

Tawde noon wonii alaa feere dañanoonde ngam waylude kaan ngonka e sabu yiɗde falanaade leydi ndi hono ko waɗi ko Koddiwaar e Somali, ko soldeteeɓe ɓe pelliti follude laamu ngu ñalnde 3 Ut 2005.

Eli Wul Mohammed Vall ina anniyii ƴeewtaade Doosɗe leydi ndi (Constitution) e dottude gardagol leydi ndi e manndaaji ɗiɗi, tawa manndaa ina dottaa e duuɓi 4 walla 5 e waylude kuulal ngal tonngoode 104 ɓeydanoongal e doosɗe leydi tawi rewaani laawol. Mudda juurnitagol «Constitution» o so heewi fotaani diwde hitaande, wooteeji gardagol leydi e dipiteeji njuɓɓinee ɗoo e duuɗi ɗiɗi so heewii.

Hooreejo goomu soldateeɓe e terɗe goomu ngu, gardiiɗo jaagorɗe e laamu mum teeɗantaako wonde hay huunde e wooteeji ɗi, tee alaa mo ɓe keedanta, golle maggu ngasata ko nde wooteeji ɗi njoofi.

Goomu ngenndi toppittoongu wooteeji maa sose, feranee laabi ceniiɗi ngam rewindaande wooteeji ɗi, tawa sunnotooɓe wooteeji ummiiɓe leyɗe goɗɗe, arooɓe seedaade, ina tawtoree.

Eli Wul Muhammed Fall ina teeŋtina no feewi pellital mum e siynude tuugnorgal mum.

O hollitii keɓagol makko e yeewtitde e denndaangal gollotooɓe to bannge politik so ɗaɓɓii ngam yeewtitde e makko e wostondirde e makko miijooji e geɗe ɗe.

O sifaaki noon mbaydi no ɗum siyirta.

UFP, caggal nde yuurnitii no feewi konngol hooreejo goomu Diisnondiral Soldeteeɓe Daraniingu Nuunɗal e Demokarasii, ina weltii e loowdi ndi e hakkille newuya e nuunɗal Hooreejo o.

Fotde hitaande hannde, e teskaade caɗeele leydi ndi wuuri to bannge politik, faggudu e renndo, UFP darinooma laŋ ngam ɗaɓɓude e hooreejo leydi pollaaɗo o nde darantoo e ko yaaccii waylude ngonka leydi ndi e dow kaaldigal.

Ndeen darnde ina yahdi e ngoƴa leydi e partiiji luulndo ndeen.

UFP kañum darnde mum gila hanki ko yo leydi men e ɓesngu men kis, tee maa jokku ndee darnde haa mudda gonaaɗo o wona e deeƴal, kellifuya, dow siynude peeje nanondiraaɗe.

UFP ina yaakorii ɗum timmata ko nde goomu soldeteeɓe ngu e denndaangal gollotooɓe politik e renndo ngo ciifondiri nanondiral, gollotoongal deeƴal, newuya, kaaldigal e dow riiwtude kala ko ina seernda leƴƴi maa diiwanuuji, sibu ko ɗum tan moƴƴinta jeewte ɗe e ciynugol tonngaaka mumen.

Pollugol laamu ñalnde 03 Ut 2005 waɗi ko e tuma nde aduna o e pelle mum caltii keɓgol laamu e ndiin mbaydi tee eɓe cakka peeje hiiɗde ɗiin laamuuji. Ngaal kiiɗal ina adda caɗeele to bannge faggudu leydi, waɗa batte bonɗe e nguurndam ɓesngu ngu.

Ɗum falortee ko nanondiral hakkunde denndaangal gollotooɓe to bannge politik e laamu ngu.

E konngol makko ngol, Hooreejo Goomu Soldeteeɓe Daraniingu Nuunɗal e Demokarasii ruttinooma e humpito leydi ndi to bannge politik, ɗuum ina moƴƴi luggiɗinee e jeewte payɗe, sabu ko ɗum nafoore wonande ngootaagu leydi ndi.

Hannde o keewal ɓesngu ngu nguurndam mum ina muusi gila e heege e nattugol woodde laamu kam e kuftodingol njeenaari e ŋakkugol nuunɗal nder polis. Ɗee geɗe so kaɓaaka njooɓoto leydi ndi.

Faggudu leydi ndi woni ko e juuɗe yimɓe seeɗa, ɓe nuunɗaani tee alɗirɓe nguyka e fenaande.

Eɗen poti tiiɗnaade paamen ngonka ka, njiilono-ɗen ka peeje laaɓtuɗe tawa ko duumiiɗe.

Miijo hannde won e partiiji ko sikkude hankadi yontii ɗo ina ndiftoo laamu, ngardoo leydi kañum en tan wonaa miijo seniingo sabu ko hono ɗiin miijooji pusi yoga e leyɗeele Afrik.

Ndiiwtirten ɗiin miijooji ko semmbinde kaaldigal e ardinde hakkille maalde.

So en ndariima, en ngardinii kaaldigal hakkunde denndaangal juɓɓule gooɗɗe e leydi ndi ma en kisnu daawal gonangal ngal, tee ngal jibinana en moƴƴere.

Ndaroɗen enen kala mbele eɗum wona.

Nuwasoot, ñalnde 08 Ut 2005

Ardorde UFP



See who's visiting this page.

View Page Stats

Pour toute question ou remarque concernant l'Ufp ou ce site Web,
écrire à infos@ufpweb.org
Copyright © 2005